Ακούστεν, ακούστεν εμέν, εγώ κάτ’ θέλω να λέ’ω,
Άψιμον έχ’ η κάρδια μ’, κι’ από ‘πέσ-ι-μ καίω.
Άμον ενετριχίασα, το αίμα μ’ κοχλακίζει,
η γνώση του πολιτισμού απ’ άτωρα αρχίζει.
Ατό ντο ενεμείναμε, εμείς ατόσα χρόνια,
Έρθεν η ώρα να λαφρύν’ τη κάρδιας-ι-μ’ τα πόνια.
Όλιον το εικοσ’τετράωρον, αδά ‘ς σην ξενιτείαν,
Εμπαίνουμε ‘ς σο «PONTOS NEWS», ‘φτάμε ‘πικοινωνίαν.
Μαθάνουμε τα νέα μουν, ποντιακά κι’ άλλα,
ιστορίαν, πολιτισμόν και θέματα μεγάλα.
Θέατρον, λύρας παίξιμον, την γλώσσαν των προγόνων,
τ’ ομηρικόν, ντ’ εκράτεσαν, πέραν τριών αιώνων!
Φαΐν, ποτίν και μουχαπέτ, Ποντογαστρονομίαν,
Το χωρίο σ’, τα ρίζας-ι-σ’ και πατριδογνωσίαν!
Σέρραν χορόν και τρομαχτόν, ομάλ’ και την πατούλαν,
διπάτ’ και τίκ’ ‘ς σο γόνατον, δίν’ την καρδία μ’ βρούλαν.
Ποντιακόν Συμπόσιον, ‘ρματών’ κάθαν ημέραν,
αναστορά αλήθειας, κάθαν λεπτόν κι’ ώραν.
Για ύψωμαν προσφέρν’ εμάς, γνώσην και νουν αΐκον,
ν’ελέπομε αλήθειαν ν’εφτάμε το καθήκον!
«PONTOS NEWS» εν’ παράδοση, έθιμα, κοινωνίαν,
να κοινωνιζ’νε Πόντιοι, ίλιαμ’ Γενοκτονίαν.
Πάντα εσύ να ε’εις ‘ς σο νούς, πάντα εσύ ωτίν να κρούς,
πάντα κατενά ν’ ακούς, ντο θα λέει το «PONTOS NEWS».
Συγγραφτικά ‘κι ψαλαφώ, τάξιμον ‘κι περμένω,
τα νέα μουν ΄ς σο «PONTOS NEWS», πάντα θα αναμένω!
Πορτολόης ο Σταματέτες
Βοστόνη, Τρυγομηνά 31, 2014
